هاوڕێ مٶید ئەحمەد! هاوڕێیانی مەکتەبی سیاسی دوای سڵاو!
وەکو لەم نوسراوەی خوارەوەدا رونم کردوەتەوە کە ئیتر من لەگەڵ حککع کار ناکەم. بێگومان من ناچارم ئەم نوسراوە لە ئاستی کۆمەڵگادا بڵاوبکەمەوە بۆ ئاگاداری گشتی و بۆ ئەوەی چیتر من چی دەڵێم و چی دەکەم، هەروەها حککع چی دەڵێ و چی دەکات، لەسەر یەکتر حیساب نەبین. لەمە زیاتر من نامەوێ نە تەبلیغ بۆ ئەم مەسەلەیە بکەم و نە تەبلیغات لە دژی حککع بکەم. هەروەها بۆ ئەوەی حزب و رابەری نەخەمە بەردەم هەڵوێست و بڕیارێکی لە ناکاوەوە، من هەفتەیەک بلاوکردنەوەی عەلەنی ئەم نوسراوە رادەگرم، وا بە گونجاوی دەزانم لەم هەفتەیەدا بیدەن بە ریزەکانی حزب. پاش ئەوە من تەنها لەسەر لاپەرەی فەیس بوکی خۆم دایدەنیم.
لەگەل ریز و سلاوم
ریبوار احمد/ ٢٨-٩-٢٠١٧
کاری من لەگەڵ حزبی کۆمۆنیستی کرێکاریی عێراق کۆتایهات
زۆر بەداخەوە کە ناچارم دان بەو راستیەدا بنێم کە ئیتر حزبی کۆمۆنیستی کرێکاری عێراق، حزبیک نیە من بتوانم لە ئاستی سیاسی و کۆمەلایەتی و پراتیکی، وە هەروەها لە بواری سوننەتی هەڵسورانی حزبی و تەنانەت لە شێوەی ئێستای پەیوەندیە دەرونیەکان و ئەو سوننەتی تەحەزوبەی بە کردەوە پەیرەوی لێ دەکات، بەرگری لێ بکەم. ئەم واقعیەتە تاڵە بۆ من هیچ رێگایەکی نەهێشتوەتەوە جگە لەوەی جیایی خۆم لە حزبێک رابگەیەنم کە لە دامەزراندن و هەڵسوڕان و بەرەوپێشبردنی کارەکانیدا، تەمەنێکی درێژ بە ئەندازەی توانا بەشداریم کردووە و بەردەوام لە خەمیدابووم. لەگەڵ ئەوەی کە لە چەندین رووەوە، سیاسی و پراتیکی و نەرێتی ناکۆکی و ئیختلافم لەگەڵ سیاسەت و پراتیک و شێوەکاری حزب هەیە و لانی کەم لەم یەک دوو ساڵەی دواییدا جگە لەو وتارانەی کە بە عەلەنی و بەشێوەی ئیسپاتی نەک ئینتقادی رای خۆمم دەربڕیوە، چەند جارێکیش لەم بارەیەوە نەزری خۆم بە نوسراو داوە بەرابەری حزب. بەلام ئەمە خۆی لە خۆیدا بە تەنیا هۆکار نەبووە و نیە بۆ کۆتایهێنان بە کارم لەگەڵ حککع، ئەم حزبەهەر لە رۆژی دامەزرانیەوە هەمیشە جیاوازی و ناکۆکی سیاسی و فکری و شێوەکاریی تیابووە. هەندێک جار ئەو خیلافاتانە توندبونەتەوە و هەندێک جار خاوتر. من هیچ کات بە خەیاڵمدا نەهاتووە لەسەر بنەمای جیاوازی بۆچونی فکری و سیاسیم بیر لە جیابونەوە یان وازهێنان لەم حزبە بکەمەوە. چونکە ئەمە بە دیاردەیەکی زۆر طبیعی ناو ئەحزابی سیاسی دەزانم و ناتوانم تصوری حزبێکی سیاسی بکەم بەبێ بوونی جیاوازی بۆچون لە ئەبعادە جیاجیاکاندا. ئەوەش لە حزبی ئێمەدا بۆ ساڵەهای سال نەرێتێک بوو کە هەر ئیختلافێکیش لە ئارادا بووبێ، لە تحلیلی نهائیدا توانیمانە ئەوەندە ئینسجام پێکبهێنین کە لە روانگەی بەرژەوەندی حزب و بزوتنەوەکەوە وەحدەتی ئیرادەی حزب و یەکپارچە مانەوەی بپارێزین، ئالیاتی بردنەپێشی جیاوازیەکان بە تقلیدی حزبی رێکبخەین، وە هەمیشە (جگە لە مواردی تاک و تەرا و کورتماوە و کەم تەئسیر) لە ئاستی کۆمەڵگادا حزب وەکو پەیکەرێکی واحد نیشانبدەین.
دەربارەی ئەوەی کە چۆن و لە چ پرۆسەیەکدا گەیشتم بەم بڕیارە؟ هەرکات بە پێویست و گونجاوم زانی هۆکار و بەڵگەکانی زیاتر رادەگەیەنم. بەڵام لێرەدا تەنها بە کورتی رونکردنەوەی چەند خاڵ لە بارەی ئەم بڕیارەمەوە، بە پێویست دەزانم؛
- بەپێی ئوصولەکانی رابەری کۆمۆنیستی لە سونەتی بزوتنەوەی کۆمۆنیزمی کرێکاریدا، ئەرکی رابەری حزب بووە کە سیاسەتی رۆشنی کۆمۆنیستی داڕێژێت و پاشانیش جەسورانە بەرپرسیارێتی هەر هەڵەیەک لە هەر ئاستێکی سیاسی و پراتیکی و رێکخراوەییدا بگرێتە ئەستۆ. بەداخەوە رابەری ئێستای حزب لەو زەمینانەدا ئەو تایبەتمەندیانەی رابەری کۆمۆنیستی لە خۆی نیشان نادات. لەم بارەیەوە تەنها وەکو نموونە باسی سیاسەت و تەعاملی حزب لەگەڵ دوو تەحەولی زۆر گەورە دەکەم؛
یەکەم/ بە پێچەوانەی ئەوەی کە راشکاوی و جەسوری و قاطعیەت بەشێکە لە نەرێتە کۆمۆنیستیەکانی هەموو مێژووی کۆمۆنیزمی مارکس، کەچی لە پەیوەند بە جەنگی موصلەوە ئەو نەرێتە پێرەوی کرا کە خەتای خەڵک بگرین لەسەر ئەوەی لێکدانەوەی هەڵە و نادروست بۆ هەڵویستەکانمان دەکەن. حزب لە بەرامبەر جەنگی موصلدا بە بەیانێک هەڵوسیتی خۆی دەربڕی و وتی “ئەم جەنگە دەبێ دەستبەجێ راوەستێ” لێرەدا باسی من لەسەر دروستی و نادروستی ئەم هەڵوێستە نیە، بەڵام لە بەرامبەر پرسیار و رەخنەگەلێک کە لە ناو حزب و دەرەوەی حزبەوە لەسەر ئەم هەڵوێستە خرانەڕوو، وەڵامی کۆمۆنیستی رۆشن و راشکاو و جەسورانە ئەوەبوو کە ئەگەر حزب ئەم هەڵویستەی خۆی بەراست و دروست دەزانێ دەبوو راشکاوانە بەرگری لێ بکات، ئەگەریش لێی پەشیمانە و بە نادروستی دەزانێ دەبوو راشکاوانە دان بە نادروستیەکەیدا بنێ و شۆرشگێڕانە رەخنەی لێ بگرێت. بەلام حزب هیچ کام لەمانەی نەکرد لە جیاتی ئەوانە کەوتە تەبریر هێنانەوە و خەتابارکردنی خەڵک بە هەڵە تیگەیشتن لە سیاسەتی حزب، گوایە لە جیاتی سەرنجدان لە ناوەرۆکی بەیانەکە تەنها لەسەر ناونیشانەکەی حوکم دەدەن”جەنگ دەبێ دەستبەجێ راوەستێ”! هەروەها هێنانەوەی پاساوی ئەوەی کە عنوانەکەی کەمیک بیدیقەتی تیاکراوە! “دەربارەی جەنگ دژی داعش و شەڕی موسڵ..گفتوگۆ لەگەڵ موئەیەد ئەحمەد سکرتیری کۆمیتەی ناوەندی حککع”
دووەم/ لە پەیوەند بە ریفراندۆمەوە(یەک ریفراندۆم لە ئارادایە) بەیانی حزب وتی ریفراندۆم مافی خەڵکە و میکانیزمێکی گونجاوە بۆ چارەسەری کێشەی کورد، هەر لەو بەیانەدا جەخت لەسەر ئەوە کراوە کە حککع لە هەموو مەیدانەکانی خەباتدا پشتیوانی لە حککک دەکات. کەچی بە دوای بەیانەکەدا ئەو باسانەی دەبوو لە ناوئۆرگانە رابەریەکانی حزبدا یەکلابکرینەوە، لە سۆسیال میدیادا کرانە جێگای جەدەلی رابەران و کادرانی حزب. بە زنجیرە وتار نوسرا لە دژی ریفراندۆم و هەڵویستی حککک. لەم بارەیەشەوە دیسان لە بەرامبەر ئەو رەخنەیەی کە ئەم زنجیرە وتارانەی لەلایەن ئەندامانی باڵاترین ئۆرگانی رابەریەوە نوسراون ناکۆک و دژی هەلوێستی رەسمی حزبن کە لە بەیانەکەدا هاتووە؟ پاساوی ئەوە هێنرایەوە کە حککع ریعایەتی حکککی کردوە و نەویستوە راستەوخۆ هەڵوێستێکی پێچەوانەی هەڵوێستی حککک دەربڕێت. بۆیە بەیانەکە هەدەفمەندانە جۆرێک داڕێژراوە کە “بە شێوەی گشتی باسی ریفراندۆمی کردوە” دەکرێت هەم وەکو لایەنگری ریفراندۆم و هەڵوێستی حککک تەفسیر بکرێت و هەم بە پێچەوانەوە! ئەمە کرایە پینەکردنی ئەوەی کە زنجیرە وتارەکان ناکۆکیان لەگەڵ هەڵویستی رەسمی حزب و بەرنامەی حزب نیە! ئایا ئەمە هەڵوێستێکی شایستەی حزبێکی کۆمۆنیستیە؟! لە کاتێکدا ریفراندۆمێکی تایبەت و دیاریکراو لە ئارادایە، بۆچی لە جیاتی هەڵوێستێکی روون و راشکاو بەرامبەر ئەو ریفراندۆمە بە شێوەی گشتی و نارۆشن باسی ریفراندۆم دەکرێت؟!
هاوڕێیان قبوڵی بکەن کە حزبی سیاسی، بە تایبەتیش حزبی سیاسی کۆمۆنیستی وانیە. حزبی سیاسی کۆمۆنیستی بە ئەقەلیەت و ئەکسەریەت بڕیار و تەصمیمی سیاسی راشکاو و رۆشن و ئازایانە دەدات و پاشان هەموو حزب یەکدەست دەچنە پای جێبەجێکردنی. ئەو نەرێتەی بە تایبەت لەم مەوردانەدا پێڕەوی لێکرا لە نەرێتی نادی رۆشنبیری دەچێت تا حزبی سیاسی. رەچاوکردنی هەڵوێست و دۆخی حزبی کوردستان دەکرێت بە پاساوی ئەو هەڵوێستەی کە هەموو کەس پێچەوانەی ئەو حزبەی دەریکردوە لێی تێدەگات. بەڵام هەر لەم پەیوەندەدا ئەو حزبەی کە گوایە ریعایەت کراوە، درایە بەر هێرش و حوکمی زۆر سەنگین و تۆمەتی زۆر گەورەی بەسەردا درا. لەوەش زیاتر دەرگاکان خرانە سەرپشت بۆ چەپ و چۆڵی ناو حزب و دەرەوەی حزب کە نەک هەر بە هەموو جۆریک پەلاماری “حزبی پشتیوانیکراو” بدەن، بەڵکو بیدەنەبەر ناشرینترین و سوکترین تانەوتەشەری غەیرە سیاسی. ئایا ئەمەیە رەچاوکردنی دۆخ و پشتیوانی لە حککک؟
کۆمۆنیزم و چینی کرێکار پێویستی بەم جۆرە هەڵوێستە دووفاقیە نیە! کۆمۆنیزم قەرزاری کەس و هیچ لایەنێک نیە! ئەگەر ئەم شێر و رێویە لە بارەی ریفراندۆمەوە هۆکارەکەی رەچاوکردنی دۆخی حککک بوایە، رێگای دروست و کۆمۆنیستی هەبوو؛ دەکرا راشکاوانە بلێین ئێمە لە ئێستادا(یان هیچ کاتێک) ریفراندۆم بە میکانیزم و تاکتیکێکی دروست و گونجاو…و.. نازانین، بەڵام لەگەڵ ئەوەشدا حککک وەکو حزبی هاوبزووتنەوە و هاوپەیمانمان بچێتە هەر بەرامبەرکێ وکێشمەکێشێکەوە ئێمە بە هەموو توانا پشتیوانی دەکەین و لە کەناری رادەوەستین. ئەمە کۆمۆنیستیتر بوو، راستگۆیانەتر بوو، ئوصولیتر بوو بۆ حکککش وەفادارانەتر بوو. مارکس و ئەنگلس وایان رەفتارکرد لەگەڵ کۆمۆنەی پاریس، لینین وای رەفتارکرد لەگەڵ شۆڕشی ١٩٠٥. نەک بە روالەت پشتیوانی لە حککک بکرێت و ناراشکاوی و معەدەلگیری سیاسی پی پاساو بدرێت و بە کردەوەش هێرشی بکرێتەسەر و دەرگاش بخرێتەسەرپشت بۆ کەسانی تر تا ئەم کارە بە حەماسەوە ئەنجام بدەن.
منصور حکمت لە ئوصول و شێوەکانی رابەری کۆمۆنیستیدا دەڵێ؛ (رابەری کۆمۆنیستی ئەرکێتی رۆلێکی پێشرەوانە بگێڕیت. رابەرانی کۆمۆنیست نەک بە معدەلگیری و تەوافقی بۆچونە جیاجیاکانی ناو حزب و بزووتنەوەی چینایەتی، بەڵکو لەسەر بنەمای پێشڕەوترین بۆچونەکان بریارەکانی خۆیان دەدەن. رابەری کۆمۆنیستی نەک رابەریەکی ناوەندگیرانە، بەلکو رابەریەکی جانبدارانە و قاطعە کە لەسەر بنەمای ئوصوڵی بنەڕەتی ئیدۆلۆژیک و لێکدانەوەی مشخصی خۆی لە هەلومەرج بریار دەدات و مسئولیەت و ئاکامەکانی ئەو بریارانەش لە ئەستۆدەگرێت. بەم جۆرە ئەرکی رابەریە کە هەم زوو تشخیص بدات و هەڵوێستی پێشڕەو لە بەرامبەر هەر مەسەلەیەک بگرێتەپێش، هەم بە کردەوە وەفاداری هەڵوێستی خۆی و مسئولیەتی بەرەوپێشبردنی لە ئەستۆبگرێت.)
- وەحدەتی سیاسی حزب هەمیشە یەکێکە لە گرنگترین بنەما و کۆڵەکەکانی هەر حزبێکی کۆمۆنیستی و پارێزگاریش لەم وەحدەتە یەکێکە لە گرنگترین ئەرک و مسئولیاتی رابەری حزب. یەکگرتوو کردن و یەکگرتوو راگرتنی حزب، رەخساندنی فراوانترین دەرفەت بۆ باس و گۆڕینەوەی بۆچونی فکری و سیاسی لە ناو کادرانی حزبدا، خوڵقاندنی دەرفەتی سالم بۆ پیلیمیکی سیاسی و نەزەری، سەرئەنجامیش پاراستنی یەکگرتوویی حزب لە ئەرکە گرنگەکانی رابەری حزبێکی کۆمۆنیستین. بەڵام بەداخەوە یەکپارچەیی حزبی کۆمۆنیستی کرێکاری عێراق بەرای من لەلایەن باڵاترین مەرجەعی حزبیەوە پەلامار دراوە. رابەری خۆی مبادرە بۆ پێشێلکردنی مەوازن و مقرراتی حزبی و تیوریزە کردنی. بەم جۆرە حزب وەکو نەسیجیکی سیاسی کۆمەڵایەتی منەزەم، لەلایەن رابەریەوە خراوەتە سەر رەوتی هەڵوەشان. مەحفەلیزم جێگای ئینسجام و کاری یەکدەستی حزبی گرتوەتەوە. رابەری حزب و بە دیاریکراوی مەکتەبی سیاسی خۆی پێچەوانەی پاراستنی ئینسجام و وەحدەتی حزب و بەرگری لە حزب و سیاساتی پەسەندکراو، دەستپێشخەرە بۆ ئەوەی کادر و ریزەکانی حزبیش لە ئاستی عەلەنیدا بکەونە جەنگی یەکتری.
- پێکهێنانی فەزایەکی سیاسی سالم لە حزبدا، بەرگری پەیگیرانە لە پرەنسیپە کۆمۆنیستیەکان لە حزبدا، بەرگری لە حورمەتی سیاسی و شخصی هاورێیانی حزبی بەدەر لە ئیختلافاتی سیاسی، …بەشێکن لە ئەرکەکانی رابەری هەر حزبێکی کۆمۆنیستی. بەداخەوە ئەمرۆ ئیمە شایەتی ئەوەین بە ئاشکرا و بە عەلەنی لەلایەن ئەندامی باڵاترین ئاستەکانی رابەری حزبەوە، سوکایەتی و تۆمەت هەڵبەستن بۆ هاوڕییانی هاوئۆرگان و روشاندنی کەرامەتی شخصی لە دژی شخصیاتی حزب چ بە فەردی و چ بە جەمعی دەبەخشرێتەوە و تا رادەی ئەوەی ئەمنیەت لە ناوخۆی حزبدا نەماوەتەوە. لە جیاتی گرتنەپێشی هەڵوێستی مەحکەمی کۆمۆنیستیش بەرامبەر ئەم جۆرە رەفتارانە، نسبیەتی سیاسی و دیزەبەدەرخۆنەکرنی ئەم پرەنسیپ شکاندنانە پەیڕەو دەکرێت. رەوابتی مەحفەلی ناسالم و حورمەت شکاندن رەواجی هەیە. ئەم نەرێتانە لە ئاستی رابەری حزبدا خەریکە برەوپەیدا دەکات، ئاسایی تەماشای دەکرێت و پەرەدەگرێت. لەوەش کارەساتتر ئەوەیە کە دەربرینی ناڕەزایەتی و رەخنەگرتن و هەتا شکاتکردنیش بچوکترین کاریگەری نیە. ئەوەندەی لە دەستی من هاتبێت، هەوڵمداوە سەرنجی رابەری بۆ ئەم مەترسیە و کاریگەری خراپ و تیکدەرانەی لەسەر یەکپارچەیی سیاسی حزب، راکێشم. بەڵام بەداخەوە بێ ئاکام مایەوە.
- لە رووی پراتیکی و کۆمەڵایەتیەوە من نازانم حزب لە کوێ راوەستاوە؟ بەداخەوە من نیشانەیەک لە بوونی سیاسی و کۆمەڵایەتی حزب نابینم. مەشغەلەکانی رابەری بۆ دەرهێنانی حزب لەم مەوقعیەتە چیە؟ حزبێک رەنگە بچوک بێت، بەڵام خۆ دەبێ هەوڵی گەورەبونەوە و بەهێزبوون و گۆڕانی بە هێزێکی جدی کۆمۆنیستی لە دەستوری رابەریەکەیدا بێت. ئایا رابەری حزبی کۆمۆنیستی کرێکاری عێراق ئەمەی لە دەستوری خۆی داناوە؟ ئایا هیچ نیشانە و بەڵگەیەک لە هەوڵدان بەم ئاراستەیەدا دەبینرێت؟ ئەوەی من دەیبینم تەنها دڵخۆشدەکردنە بە هەندێک سەرقالی کە پەیوەندیەکی بە خەباتی چینایەتی چینی کرێکار و جیدالاتی سیاسی و کۆمەڵایەتیەوە نیە. رابەریش بەدوای وەڵامی ئەو پرسیارانەوە نیە کە خەباتی چینایەتی و کێشمەکێشی کۆمەڵایەتی هێناویەتیە ئاراوە.
بیگومان ئەم گرفتانە ئەمرۆ یان لەم چەند مانگەدا سەریانهەڵنەداوە. ئەمانە گرفتی لەمەوپێشتری حزبن، دەمێکە ئەم وەزعیەتە و نیشانەکانی منیان دوچاری نارەحەتی کردوە و ئومێدی منیان بە حزب بەرەو لاوازی بردوە. بێگومان ئەم لێکدانەوەیەی منیش دیسان تازە نیە، لانی کەم بەر لە پلینۆمی ئەخیر لە مکالەمەیەکی تەلەفونیدا لەگەڵ هاورێی سکرتیری کۆمیەتی ناوەندی باسی ئەوەم کرد کە ئەگەر دۆخەکە وا بڕوات من ناتوانم لە کارکردن لەگەڵتان بەردەوام بم. هەروەها لە نوسراوی (حزب بەرەو کوێ و کام تصویر بۆ حزب-نوسراوی ناوخۆیی) کە بەرەسمی خستمە بەردەم پلینۆم ٣٢ کۆمیەتی ناوەندی، ئاماژەم بۆ ئەوە کردوە کە بەردەوامی ئەم دۆخە لە حزب ئومێدبڕاوم دەکات و ناچارم بیر لە رێگای تر بکەمەوە. راوەستانی بەشێک لە هاوڕێیانی کۆمیتەی ناوەندی لەسەر جهەتگیریەکانی ئەو نامەیەی من، هانیدام بۆ درێژەدان بە هەوڵەکانم و لەم بارەیەوە نوسراوی ناوخۆیی (لە پێناو بیناکردنی حزبی سیاسی یەکپارچە)م نوسی، کە لەلایەن رابەریەوە بە فەرامۆشی تەواو سپێردرا. بەهەرحال ئەوەندی لە دەستی من دەهات هەوڵمداوە لە پال باقی هاورێیانەوە بەر بەم دۆخە بگرم …بە باسی دەرون حزبی لە زەمینەی جیاجیادا، بە رەخنەگرتن و بە دانی رێگاچارەی پێشنیاری هەوڵمداوە سەرنجی رابەری حزب راکێشم بۆ گیروگرفت و مەترسیگەلێک کە حزب لەگەڵیان بەرەورووە. هەروەها لە باسە عەلەنیەکانمدا هەوڵمداوە بە شێوەیەکی ئیسپاتی سەرخەتی سیاسەتی پێشڕە و کۆمۆنیستی بخەمەروو، کە دەکرا کۆمەکی رابەری حزب بکات بۆ گرتنەپێشی سیاسەتی دروست لەو زەمینانەدا. ئەو هەوڵانەم لە ئاستیکدا لەگەڵ پێشوازی کادران و هەلسوراوانی کۆمۆنیست بەرەوروو بووە، بەڵام لەلایەن رابەریەوە لەگەل بێبایەخی و زۆرجاریش هەوڵی سوککردن بەرەروو بووە.
دوو هەفتە لەمەوبەر بەم نامەیە ” الرفيق مؤيد احمد! تحية وبعد
في مقال لعضو اللجنـة المرکزیة المنشور بصورة علنية اتهمني بـ”الرياء”، “الكذب”، “مشاركة البرجوازية تصورها لنيل نصيبه منها”، …عبرة هذە الرسالة ارید اعرف ماهو موقفك كسكرتير اللجنة المركزية وموقف الحزب منها؟
داوای هەڵوێستم لەسەر یەکێک لە نمونەکانی ئەم شێوە مامەڵەیە کردوە کە چەند هەفتەیە بڵاوبوەتەوە. بەپێی ئوصولی حزبی و کۆمۆنیستی ئەرکی رابەری حزب بوو کە لانی کەم بۆ بەگری لە حورمەتی ئۆرگانەکانی حزب یەکسەر ئەو سوکایەتی و تۆمەتانە تەکذیب و ئیدانە بکات و رابگەیەنێ کە لە کۆمیتەی ناوەندی حککعدا کەسی ریاکار و درۆزنی ئەوتۆی تیا نیە کە وتاری سیاسی بنوسی بۆ “مشاركة البرجوازية تصورها لنيل نصيبه منها” بەڵام رابەری حزب نەک هەر ئەو کارەی نەکرد، تەنانەت دوای نامەکەی منیش هەڵوێستیکی نەنواند و تەنانەت وەڵامێکی نامەکەشم وەرنەگرتەوە. ئەو تۆمەتانە کۆن بوون و لە ئاکامی بێدەنگی هەڵبژاردنی رابەری حزبدا، تۆمەتەکان لەلایەن چەپ و چۆڵ و کادرانێکی حزبیشەوە تەئید و لایکی وەرگرت.
بەگشتی رابەری حزب لە جیاتی وەڵامی رۆشن بە رەخنەکان، چ رەخنە سیاسیەکان و چ رەخنە رێکخراوەییەکان، کە من خستومنە سەرمێز، چ بە مخالەفەت چ بە موافەقەت، سیاسەتی بێدەنگی و خۆلادان و فەرامۆشکردنی هەڵبژارد.
بەلەبەرچاگرتنی هەموو ئەوانە و پەیوەندی من و حککع، هەروەها پێشینەی کاری من لەم حزبەدا، لەوانەش گرنگتر بەلەبەرچاوگرتنی ئەوەی کە لە ئاستی کۆمەڵایەتیدا بەدەر لە ئیرادەی خۆم و بەدەر لە جێگاوڕێگای تەشکیلاتیم، من و حککع بە جۆرێک پێکەوە گرێدراوین، لە کۆمەڵگادا و بەتایبەتی لە ناو کۆمۆنیستەکان و بزووتنەوەی کۆمۆنیستی و کرێکاریدا بەم جۆرە لێکدەدرێتەوە، بۆیە من ناچارم ئەم بڕیارە بدەم. لە کاتێکدا ئەم بڕیارە بە ئەندازەی ئەو بریارە بۆ من گرنگە کە بۆ دامەزراندنی ئەم حزبە لەگەڵ هاوڕێیانێکی تردا دامان، بەڵام بەراستی لەو بڕیارە بۆ من سەخت و سەنگینترە. پەیوەندی تایبەتی من لەگەڵ ئەم حزبە و تێکهەڵکێش بونمان لە ئاستی کۆمەڵایەتی و بزووتنەوەی کۆمۆنیستیدا، تەنانەت بواری ئەوەم بۆ ناهڵێتەوە کە سەرباری هەر رەخنە و جیاوازیەکی سیاسیم وەکو ئەندامێکی سادەی ئەم حزبە بمێنمەوە. هەڵبژاردنی بێدەنگی و مانەوە لە حزبدا وەکو ئەندامێکی بێقسە بۆ من نەگونجاوە. هەرچەند لە ماوەکانی رابردوودا ئەمەشم تەجروبەکرد و بەکردەوە بۆم دەرکەوت کە ناکرێ و ناگونجێ.
ئەگەر باری تەندروستی رێگای بدایە، خۆم بۆ باڵاترین ئاستی حزب کاندید دەکرد و بە گوێرەی توانا هەوڵمدەدا حزبێک کە پێکەوە دامانمەزراندوە لەم گێژاو و دۆخە دەربێت. بەداخەوە باری تەندروستی لانی کەم لە ئێستادا بواری هەڵبژاردنێکی وام پێ نادات.
بەلەبەرچاوگرتنی ئەم واقعیەتانە تەنها رێگا بۆ من، سەرباری سەختی کارەکە خۆجیاکردنەوەمە لە حزب. ئەمە ئەو دۆخە بۆ من پێکدەهێنێت کە بەرپرسیارێتی ئەو سیاسەت و پراتیکانە نەکەوێتە ئەستۆم کە لە واقعدا من هیچ دەورێکم لە دارشتن و پیادەکردنیاندا نەبووە و بەڵکو زۆرکات رەخنەشم لێیان هەبووە. هاوکات ئەمە ئیمکان بە من دەدات کە هەرکات بە پێویست و دروستی بزانم بە شێوەیەکی رۆشن هەرباسێکی سیاسی و هەتا رەخنەگرانەم هەبیت، بەیانی بکەم.
ئەمە پەیوەندیەکی رۆشنتر و سیاسیتر و کۆمۆنیستیتر و راشکاوتر لە نێوان من و حزبی کۆمۆنیستی کرێکاری عێراق و رابەریەکەی پێکدەهینێت. پەیوەندیەک کە بەرای من لە بەرژەوەندی هەموومانە؛ هەم من و هەم حزب و هەم کۆمۆنیستەکان و بزووتنەوەی کۆمۆنیستی.
هەر لێرەدا ئەوە بلیم کە من هەوڵنادەم و مەبەستم نیە هیچ هاندانێک بکەم بۆ پەرەدان بە نائومێدی بە حککع. وەکو وتم ئەگەر بکرایە وەکو ئەندامێکی حزب دەمامەوە. بەڵام پەیوەندی لە پێشینەی من لەگەل حزب بواری ئەو پەیوەندیە بۆ شخصی من ناهێلێتەوە. بێگومان ئەم بڕیارەم هیچ لە هاوڕییەتی و دۆستایەتی و هاوخەباتی و هەتا هاوفکریم لەگەڵ ئێوە بە تایبەت هەر هاوریەک کە هەست بەبونی ئەمانە لەگەل من دەکات، ناگۆڕێ. میژوویەکی دریژ لە کارو خەباتی کۆمۆنیستی لە ریزی حککع بۆ من جیگای شانازی و گرنگترین برگەی ژیانی سیاسیم بوو. ئەو خەباتەش بە هاورێیەتی و هاوسەنگەری لەگەل ئێوە بۆ من مەیسەر بوو. ریز و پێزانینی زۆرم بۆ هاوریەتیتان هەیە.. هەروەها دلنیابن لەوەی کە لێرە بەدواش من بەتوندی پابەند دەبم بە پەیوەندیەکی سالم و دۆستانە لەگەڵ حزب و رابەری حزب، لەسەر بنەمای ئیحترامی سیاسی متەقابل و هیواو چاوەروانیم ئەوەیە کە حزب و رابەری حزبیش نەک هەر پابەندی ئەمە بێت، بەڵکو کادران و ئەندامانی حزبیش بەمە پابەند بکات و بواری لادان لەم پرەنسیپە نەدات.
دەستەکانتان دەگوشم و لە قوڵایی دلەوە هیوای سەرکەوتنتان بۆ دەخوازم
ریبوار احمد/ ٢٨ سپتمبری ٢٠١٧